माथिल्लो त्रिशूली-१ मा उद्धारका लागि मिनी एक्स्काभेटर पुर्‍याइयो

२५ भदौ, काठमाडौं । बाढीले क्षतिग्रस्त २१६ मेगावाटको माथिल्लो त्रिशूली–१ आयोजनामा थप उद्धारका लागि मिनी एक्स्क्याभेटर पुर्‍याइएको छ । आयोजनाको क्याम्प एरियामा उद्धार तथा खोजीका लागि बिहीबार मिनी एक्स्क्याभेटर पुर्‍याइएको जानकारी आयोजनाका निर्देशक गिरिराज अधिकारीले दिए । बिहीबार पनि आयोजनाको सुरुङ तथा हेडवर्क्समा हराइरहेकाहरूको खोजी भइरहेको उनले बताए । आयोजनाको सुरुङ एरियामा नेपाली सेनाको टोलीले म्यानुअल्ली खोजीको काम गरिरहेको र बिहीबार पुर्‍याइएको बबक्याटले नदीको अर्कोतर्फ रहेको क्याम्प एरियामा खनेर खोजी गर्ने उनले बताए । नेपाली सेनाको हेलिकोप्टरबाट यो उपकरण आयोजनास्थल मैलुङमा पुर्‍याइएको उनले बताए ।

उद्धारमा नेपाली सेना, नेपाल ड्रोन एसोसियसन, कोरियाली, शेर्पासहितको टिम सहभागी छ भने तालिमप्राप्त सर्च डगले पनि खोजिरहेको छ । अहिले रहेको सीमित स्रोत साधनको आधारमा खोजी कार्य जारी राखिएको आयोजनाले जनाएको छ । आयोजनास्थलमा ठूला एक्स्क्याभेटरहरू पुर्‍याउन नसकिएको पनि अधिकारीले जानकारी दिए । नेपाली सेनाको १६ जनाको सर्च टोलीले डिसेण्डर क्षेत्रमा फेरि बिहीबार पनि सर्च गरेपनि कुनै नभेटिएको जानकारी दिएको छ । तर बिहीबार हाकुबेँशीस्थित फुलबारी त्रिशुलीको बाँया किनारमा एक शव पहिचान गरी नेपाल प्रहरीलाई जानकारी दिएको कम्पनीले जनाएको छ । कम्पनी, डुसान र पावर चाइनाका व्यवस्थापन पक्षले प्रतिनीधिहरूले बिहीबार हालसम्म भएको सर्च र उद्धारबारे संक्षिप्त जानकारी गरेको थियो, भने उपकरणको एमआई १७ हेलि लिफ्टिङको लागि अनुरोध पनि गरेको छ ।

यसैगरी लगानी बोर्डका प्रमुख कार्यकारी अधिकृतसँग कम्पनी व्यवस्थापनले संक्षिप्त बैठक गरी हालको अवस्थाबारे जानकारी दिएको थियो । यसैगरी बिहीबार नै बेपत्ता कर्मचारीहरूका नजिकका हकदारहरूलाई तत्काल राहत उपलब्ध गराउने कार्य सुरुवात भइसकेको जानकारी पनि कम्पनीले दिएको छ । बाढी आउनुअघि आयोजनास्थलमा कुल एक हजार ४३३ जना कार्यरत थिए । तीमध्ये हालसम्म ८ सय ७८ जनाको उद्धार गरिएको छ ।