गैँडाकोटमा दुई बस एकआपसमा ठोक्किँदा १८ जना घाइते

२८ भदौ, नवलपरासी (पूर्व) । गैँडाकोट नगरपालिका–१२, हर्कपुरस्थित पूर्व–पश्चिम राजमार्गमा शनिबार बिहान दुई वटा यात्रुवाहक बस एकआपसमा ठोक्किँदा १८ जना यात्रु घाइते भएका छन्।

शनिबार बिहान करिब ६:५० बजेको समयमा नारायणगढबाट बुटवलतर्फ जाँदै गरेको लु २ ख ६४५७ नम्बरको बसलाई सोही दिशातर्फ आउँदै गरेको लु २ ख ६०३६ नम्बरको बसले पछाडिबाट तीव्र गतिमा ठक्कर दिएको जिल्ला प्रहरी कार्यालय नवलपरासी पूर्वले जनाएको छ।

दुर्घटनामा दुवै बसमा सवार १८ जना यात्रु घाइते भएका छन्। घाइतेहरूलाई तत्काल उद्धार गरी उपचारका लागि चितवनको भरतपुरस्थित पुरानो मेडिकल कलेज र नयाँ मेडिकल कलेजमा पठाइएको छ। घाइतेमध्ये केहीको अवस्था मध्यम रहेको र अधिकांशको अवस्था सामान्य रहेको अस्पताल स्रोतले जनाएको छ।

दुर्घटनापछि केही समय अवरुद्ध बनेको पूर्व-पश्चिम राजमार्ग प्रहरीको पहलमा दुर्घटनाग्रस्त सवारी साधनहरू हटाएर दुईतर्फी नै सुचारु गरिएको छ। दुर्घटनाबारे थप अनुसन्धान भइरहेको प्रहरीले जनाएको छ।